June 26, 2025

【男生穿搭指南】4大穿搭黃金原則｜3種風格搭配示範，型格魅力輕鬆上手！

香港嘅男生穿搭可能比人嘅感覺係千篇一律，喺街度多數會見到十個有九個男仔都係著緊 T-shirt 同短褲。可能好多男仔覺得穿搭好難搞，又唔知點襯先好，所以先求其著。但其實第一印象真係好重要！無論你係約女仔出街，定係返工見客，一個好嘅穿搭就係建立人哋對你第一印象嘅關鍵！識得打扮嘅男仔，除咗睇落精神啲，仲會不自覺咁展示到個人魅力。

呢篇文章就會同大家分享一啲實用又簡單嘅男生穿搭技巧，仲會推薦唔同嘅男生必備單品，幫你輕鬆打造最啱自己嘅 Style！

男生穿搭基礎原則

想學識點襯衫，首先就要搞清楚幾個基本原則！咁就可以掌握男生穿搭技巧嘅基礎，知道點樣入手男生必備單品啦！

1. 比例掌握

男仔著衫著得好，最緊要就係個「黃金比例」！建議跟返 4:6 嘅穿搭比例，成個人望落去即刻高啲同瘦啲。同埋，可以運用「一長一短」或「一寬一窄」嘅原則，例如：上身長下身短，或者上身闊下身窄，咁視覺上就會顯得有層次感。

另外，短褲配寬鬆上衣，呢個組合就做到「上長下短」嘅效果，望落去 Casual 得嚟又不失有型。如果想著長褲，就建議可以揀返條高腰褲，拉長返雙腳線條。著九分褲嘅話就可以露出少少腳踝，或者加返個增高鞋墊，拉長身形比例！

2. 配色技巧

男生穿搭嘅配色原則其實好簡單，就係唔好著超過三隻色上身！可以試下同色系呢個安全又易襯嘅配搭，例如：深藍同淺藍，或者大地色系。至於黑色、白色、灰色嘅衫就係男生必備單品，因為夠晒百搭，所以可以多啲利用佢哋嚟做基礎色襯衫。

3. 層次感

如果想男生穿搭睇上有品味啲，就要靠層次感啦！可以利用唔同質料同長短嘅衫褲疊穿，提升整體穿搭嘅質感。例如：喺一件淨色 T-Shirt 出面加件薄恤衫，咁樣已經就做到個層次感出嚟。喺質料方面，可以試吓棉質、麻質、牛仔布、針織衫等，混搭出唔同感覺。

4. 頭肩比與版型

一個好嘅男生穿搭，除咗比例同顏色，版型都好重要㗎！因為如果件衫嘅版型唔好睇，就會影響成個人嘅氣場。如果想睇落有氣勢啲，就可以揀啲硬挺啲嘅布料，或者有少少墊肩設計嘅上身衫，咁就可以輕鬆打造「直角肩」！另外，如果想著落肩上衣嘅話就要留意返個版型設計，唔係單純買大一個碼就得，都要睇吓件衫嘅肩線設計係咪真係啱你嘅身形，咁著落上去先會型！

3種常見的男生穿著搭配風格

1. 歐美穿搭：雅痞俐落 X 質感成熟

歐美男生穿搭風格嘅重點係突顯身材線條，同埋成熟氣質。顏色方面就通常用咗卡其色、深啡色、灰色、黑色，同埋白色。一啲常見嘅歐美男生穿搭包括：西裝褸、西裝褲、恤衫、皮鞋、純白 T-Shirt，加埋條皮帶，成件事就 Perfect 喇！

2. 日系穿搭：寬鬆慵懶 X 多層次

日系男仔穿搭嘅重點就係著出層次感，同埋帶俾人一種隨性嘅感覺。上身可以著一件 Oversize T-Shirt，之後可以再加件針織背心或者恤衫喺出面，營造出自然嘅感覺。下身就可以襯條寬鬆嘅工裝褲或者丹寧褲，之後再著對波鞋或者帆布鞋。另外，配件亦都係日系穿搭嘅重要元素，可以戴返頂棒球帽，如果想文青啲嘅話就可以孭個帆布袋。